नको देवराया अंत आता पाहू
प्राण हा सर्वथा, जाऊ पाहे

हरिणीचे पाडस, व्याघ्रे धरीयेले
मजलागी जाहले तैसे देवा

तुजविण ठावं न दिसे त्रिभुवनी
धावे हे जननी विठाबाई

मोकलूनी आस, जाहले उदास
घेई कान्होपात्रेस हृदयात 

गीत - संत कान्होपात्रा
संगीत - आनंदघन
स्वर - पं. हृदयनाथ मंगेशकर 
चित्रपट - साधी माणसं (१९६३)

तुझे रूप चित्ती राहो, मुखी तुझे नाम
देह प्रपंचाचा दास, सुखे करो काम

देहधारी जो-जो त्यासी विहीत नित्यकर्म
सदाचार नीतीहुनी आगळा ना धर्म
तुला आठवावे, गावे, हाच एक नेम

तुझ्या पदी वाहिला मी देहभाव सारा
उडे अंतराळी आत्मा, सोडुनि पसारा
नाम तुझे घेतो गोरा, म्हणूनी आठवावं

गीत - ग. दि. माडगूळकर
संगीत - सुधीर फडके
स्वर - सुधीर फडके
चित्रपट - संत गोरा कुंभार (१९६७)

तिन्ही लोक आनंदाने भरुन गाउ दे रे
तुझे गीत गाण्यासाठी सूर लावु दे रे

शुभ्र तुरे माळुन आल्या निळ्या निळ्या लाटा
रानफुले लेवुन सजल्या या हिरव्या वाटा
या सुंदर यात्रेसाठी मला जाउ दे रे

मोर केशरांचे झुलती पहाटेस दारी
झऱ्यातुनी दिडदा दिडदा वाजती सतारी
सोहळ्यात सौंदर्याच्या तुला पाहु दे रे

शांत शांत उत्तररत्री मंद मंद तारे
तुझे प्रेम घेउन येती गंधधुंद वारे
चांदण्यात आनंदाच्या मला न्हाउ दे रे

एक एक नक्षत्राचा दिवा लागताना
आणि फुले होण्यासाठी कळ्या जागताना
पौर्णिमा स्वरांची माझ्या तुला वाहु दे रे

गीत - मंगेश पाडगावकर
संगीत - यशवंत देव
स्वर - सुधीर फडके

तुझ्या गळा, माझ्या गळा
गुंफू मोत्यांच्या माळा
ताई, आणखि कोणाला ?
चल रे दादा चहाटळा !

तुज कंठी, मज अंगठी !
आणखि गोफ कोणाला ?
वेड लागले दादाला !
मला कुणाचे ? ताईला !

तुज पगडी, मज चिरडी !
आणखि शेला कोणाला ?
दादा, सांगू बाबांला ?
सांग तिकडच्या स्वारीला !

खुसू खुसू, गालि हसू
वरवर अपुले रुसू रुसू
चल निघ, येथे नको बसू
घर तर माझे तसू तसू.

कशी कशी, आज अशी
गंमत ताईची खाशी !
अता कट्टी फू दादाशी
तर मग गट्टी कोणाशी ?

गीत - भा. रा. तांबे
संगीत - वसंत प्रभू
स्वर - आशा भोसले, सुधीर फडके