ठाऊक नाही मज काही !
ठाऊक आहे का तुज काही,
कशी होती रे माझी आई ?

मऊ जशी ती साय दुधाची,
होती आई का तशी मायेची ?
बागेतील ते कमल मनोहर,
आई होती का तशीच सुंदर ?
देवाघरी का एकटी जाई ?
ठाऊक आहे का तुज काही,
कशी होती रे माझी आई ?

चिउकाऊची कथा चिमुकली,
सांगत होती का ती सगळी ?
अम्हांसारखे शुभंकरोती,
म्हणे रोज का देवापुढती ?
गात असे का ती अंगाई ?
ठाऊक आहे का तुज काही,
कशी होती रे माझी आई ?

मऊ साइहुन आई प्रेमळ !
गंगेहून ती आहे निर्मळ
अमृताचे घास भरविते
आभाळापरी माया करीते
आईवाचून मीही विरही
ठाऊक आहे का तुज काही,
कशी होती रे माझी आई ?

गीत - मधुसूदन कालेलकर
संगीत - राम कदम
स्वर - स्नेहल भाटकर, वसुमती दोंदे
चित्रपट - एक धागा सुखाचा ( १९६०)

टाळ बोले चिपळीला, नाच माझ्यासंग
देवाजीच्या दारी आज, रंगला अभंग

दरबारी आले, रंक आणि राव
सारे एकरूप, नाही भेदभाव
गाउ नाचु सारे, हो‍उनी निःसंग

जनसेवेपायी, काया झिजवावी
घाव सोसुनिया, मने रिझवावी
ताल देउनी हा, बोलतो मृदंग

ब्रम्हानंदी देह, बुडुनीया जाई
एक एक खांब, वारकरी होई
कैलासाचा नाथ, झाला पांडुरंग

गीत - जगदीश खेबुडकर
संगीत - राम कदम
स्वर - पं. भीमसेन जोशी, पं. वसंतराव देशपांडे
चित्रपट - भोळी भाबडी (१९७२)